من فكَدناك يهادينه ونبينه ... تدري بالصار يبو القاسم علينه
عذبونه ... حاربونه
************************************************** ******
بمصابك يا حبيب الله ... تمر عالناس يا ذكره
حزن ودموع وإموادع ... وبوسط الكَلب جمره
فكَدناك ونعاك الدين ... ليلك ما طلع فجـــــــره
رحت واملاك رب الكون ... بجت لجلك يبو الزهره
واليعادوك يعادونه بغيابك ... فرحت إعداك يهادينه بمصابك
ما رعونه ... حاربونه
************************************************** ******
أول حزن من بعدك ... فجعونه بأشد مصاب
أعداءك يبو الزهره ... عصروا زهرتك بالباب
ضلعهم سيدي كسروه ... ومحسن طاح بالأعتاب
ما حفظوا أبد حرمه ... إلك يا طاهر الأصلاب
دفعوا الباب على الزهره الزجيه ... وأبو الحسنين تجتف بالوصيه
لوعونه ... حاربونه
************************************************** ******
بعد إمصيبة الزهره ... يهادينه عرفت شصـــــار
من غدروا إبن عمك ... حيدر علي وحامي الجار
تدري إنطبر بالمحراب ... شاهد فعلة الأشــــــرار
تدري بسيف إبن ملجم ... إنهدم ركن الهدى وإنهار
حتى جبريل رفع صرخة مصابه ... شاف أبو حسين صفه دمه خضابه
حيرونه ... حاربونه
************************************************** ******
رجعوا بالحقد نفسه ... وهذا الحال كل مده
هالمره الجتل بالسم ... كَطعوا للحسن جبده
مرارة هالمصيبه اشلون ... شده يالنبي شده
شرادت يا رسول الله ... من هذا الفعل جعده
الهذا المصاب يهادينه اشيجيبك ... تصبر اشلون يسمونه حبيبك
أفجعونه ... حاربونه
************************************************** ******
الأشد وأصعب يبو العتره ... من الماضي للحاضر
صار بكربلاء حسين ... شوف شصار بالعاشــــــر
بمحرم سبطك يذبحوه ... وصدره إنداس بالحافر
راسه اعله الرمح رفعوه ... مصيبه التكسر الخاطر
راس الحسين عله عالسمهريه ... حيث الشام مشت زينب سبيه
صوبونه ... حاربونه
**************************************
ما بين الجتل والسم ... من ذاك الوكت لليــــــــــــــــوم
ما كفّاهم إعـــــــــــــــداءك ... منه راح جم معصـــــوم
لحد هذا الزمن والموت ... على انصارك نشوفه يحوم
عاين أمتك تعرف ... كل المخفي والمضمـــــــــــــــوم
هدم الكَبور عكس طبع اليعادوك ... والنواصب طبعهم ما يحبوك
فجرونه ... حاربونه
************************************************** ******
شاهد فتوة التكفير ... حقد الناصبة اشلونه
كلمن واله أهل البيت ... يالهادي يكفرونـــه
فجرونه يبو القاسم ... واعله الإسم ذبحونه
أمير الي ذبح عشره ... بهالكنيه يسمونـــه
هذا الإرهاب طبع بيهم نعرفه ... من الأصلاب عليهم هذا وصفه
هجّرونه ... حاربونه
************************************************** ****** عمار هليل الواسطي