الراية بيدك كَوم يا خيالهه
كربله عقدت عليــك آمالهه
***
الراية بيدك وانته عباس الغيــور
عطش سيفك يروي خله امن النحور
بجيش خصمك خل يحل يوم النشور
هذا يومك يالترجف ارجالهه
***
هذا يوم الجنت تنتظره وتكَـــــول
شايل اوصية علي فحل الفحـــــــول
أكفل الحره العقيله ابيوم أنــــــول
أذر كَوم اعداي ذر ارمالهه
***
ما تهمني ارماح واخيول وسيوف
هذا ميداني واراويهه وتشــــــوف
وحكَ بوسة حيدره لهاي الجفــــوف
لخليهه اتخاف من اخيالهه
***
أنا كاتب هالعهد طول السنيــــــن
وشاهد العهدي آله العالميــــــــــن
الحومة الفرسان ياخذني الحنيــــن
الغيرة صعدت خل تفوت بفالهه
***
غيرتي الراضعهه من ثدي الطهــــر
صاحت بصوت النفير اعله الكفــــــــــر
تذيه بالمركاض ما تنــــــــــــدل تفر
هيج أميه تحير كون بحالهه
***
أني عندي لكربله وللحومة ديـــــن
إي وحق حامي الحمه وفارس حنين
صاح نبض البيه عونك يا حسيــــن
اعداك سيفي اليحتكم بآجالهه
***
عونك ولا تهم من حر الظمــــــــــه
غيرتي بهاي العهود إمذمــــمـــــه
لون صار العلكَمي بجبد السمــــــــه
امن السمه للجود أمد شلالهه
وها يزينب كَولي يا نبض الدليــــــل
إنتي إمري ويمي مفتاح السبيــــــل
لو سمعتج كَلتي يا خويه الكفيــــــل
شرف هالجلمه وتشرف الشالهه
***
آنه خادم كون صوتج صاح إلـــــي
كَولي عد عيناج يختـــــــي اتدللي
الخدر بحمـــــــــــاي يا زينة علي
مكرمه وهنيال حظه النالهه
***
هيجي جان الكَمر هيبة بكربلـــه
بغيرته وكافل اضعون العايلــــــه
مثل حيدر من يعدل المايلــــــــه
تموج حدره الكَاع جن زلزالهه
***
هوه فعلا ً جان زلزال الطـــفـــوف
وغيرته بيت الله شايلهــــه ويطوف
سعف مرهه الريح رجفهه الصفوف
وهذا طبع المرجله وأبطالهه